A Million Reasons Why

自2017年我開始借用呢件真人真事作為過程戲劇嘅前文本，為中學生舉行有關精神健康嘅工作坊。呢件真人真事係我嘅工作生涯斷斷續續陪伴咗我八年，曾經為中學生、老師、生命熱線義工做工作坊，近排更加將呢一個過程戲劇配合沉浸式劇場，同一時間服務接近150個中學生，前前後後差不多接近有300人經歷過呢個故事。

初初揀呢單新聞做前文本，都有猶豫——「自殺」呢個議題會唔會太尖銳、太貼身？但我又問自己：點解唔可以同學生坦誠傾呢啲事？係驚佢地未有能力消化？定係驚講咗反而會激起佢地負面諗法？但我相信，避而不談唔會令問題消失，反而令大家更加孤單。近年學童自殺嘅報導多咗，學生一定會接觸到相關資訊。倒不如，畀大家一個安全、尊重、開放嘅空間，一齊傾、一齊探索。過程戲劇就係借用「虛構嘅故事」讓參加者「有距離」地借假說真。記得第一次同社工商討教案，大家都覺得學生有能力處理，加埋有足夠人手支援，於是，就一齊決定試行。有第一次嘅經驗，讓我往後更踏實地用小美嘅故事同學生討論精神健康問題。

呢8年就著不同背景、特質嘅參加者而調節過教案，每次參加者的反應都令我感受至深。縱然參加者喺生活上面對好多不如意嘅事情，有部份更同故事主角經歷相似，但佢地仍然努力為小美帶來希望，對小美特別有同理心，更用言語同文字送上愛和祝福。每一次見證大家嘅轉變同互相支持，我都感到好動容——正正係呢種真誠同行，令生命多咗一點點希望。